Friday, July 13, 2018

குகையில் சிக்கிய குழந்தைகளை காப்பாற்றிய தியானம் !

தாய்லாந்து நாட்டில் குகையில் சிக்கிய குழந்தைகள் மீட்கப்பட்ட பின் தாய்லாந்த்தின் சீல் குழு புகழ்பெற்றதோ இல்லையோ தியானமும் யோகமும் புகழ்பெறத்துவங்கிவிட்டது.
நண்பர்கள் சிலர் பேசிக்கொண்டிருக்கும் பொழுது ஒருவர் இதனை கமெண்ட் செய்தார். அந்த பொடியனில் ஒருத்தன் ஏதோ ஒரு உணர்ச்சிவசப்பட்ட நிலையில் சொன்ன சொல், உள்ளே காத்தும் இல்லை சோறும் இல்லை அங்கே தியானம் செஞ்சா உயிர் பிழைச்சிட முடியுமா ? ஏதோ அந்த பசங்களோட அதிர்ஷம்....ஆயுசு கெட்டி என்று இன்னும் அளந்துகொண்டே போனார்....
நான் அங்கு அவருக்கு பதில் அளிக்க விரும்பவில்லை. ஏன் எனில் அவரின் மனசுவர் அப்படி. அதனை உடைத்து நான் ஒன்று கிழிக்கப்போவதில்லை . இருப்பினும் தியானம் யோகம் என்று பிதற்றிகொண்டு திரியும் நான் இது பற்றி சின்ன விளக்கம் தரலாம் என்பதினாலேயே இந்த பதிவு.
இமயத்தின் உச்சிக்கு குறிப்பாக நீங்கள் திபெத் பகுதிக்கு சென்றால் அங்கு நிறைய புத்த பிட்சுகளை பார்க்க முடியும். அங்கு நாம் பயணிக்கும் நிலைக்கான தட்பவெட்ப நிலை என்பது வருடத்தில் இரண்டு மாதமோ மூன்றுமாதமோ மட்டுமே. மற்ற நேரங்களில் ஒரு மண்ணும் தெரியாத நிலையில் பனி மூடி கிடக்கும். அத்தகையை சூழல்களில் இந்த பிக்குகள் வெளியில் வராமல் குகைக்குள்ளேயே இருப்பார்கள். பெரும்பாலும் யோகமோ இல்லை தியானமோ மட்டுமே செய்வார்கள். பசிக்கு ஏற்கனவெ பதப்படுத்தி வைத்திருக்கும் சில உணவுகளை பழங்களை சின்ன அளவில் எடுத்துகொள்வார்கள். உடல் இயக்க அளவில் சின்னதாக பசி வருமே தவிர உடல் சக்தி எப்பொழுதும் நிரம்பி இருக்கும்.
மனோசரவோர் ஏரிக்கு சென்றவர்கள் அங்கிருந்து ஒரு ஐந்து கிலோ மீட்டர் மேலே நடந்தால் ஜுகும்பா என்றொரு சின்ன குன்று வரும். அதன் உச்சியில் இதுபோன்ற பலரை பார்க்கலாம்.
அங்கு இது சாத்தியாமாக இருக்கிறது எனில் அந்த பிள்ளைகள் குகையில் இதே யுக்தியில் உயிரை தக்கவைத்துகொண்டதும் சாத்தியம்தான்.
யோகம் செய்பவனுக்கு முதல் தகுதி அச்சம் முதலில் முற்றிலும் விலகிவிடும். ஆழ்மனதில் உயிர்பயம் அறவே இல்லாமல் போய்விடும்.
அடுத்து அவனின் இதய துடிப்பு வழக்கத்தை விட குறைவாக இருக்கும். அதனால் உள்ளே இழுக்கப்படும் ஆக்சிஜன் அளவு உள்ளெயே வழக்கத்தைவிட அதிக நேரம் தங்கி வெளிப்படும். 
அடுத்து அவனின் ஆழ்மன அறிவு சாகப்போறோமா இல்லை உயிரோடு இருக்க போறோமா என்று முன்பே உணர்த்திவிடும். குகை மூடிய நிலையில் நாமெல்லாம் சாகமாட்டோம் உயிர் பிழைத்துவிடுவோம் என்ற அசாத்திய எண்ணம் வலுப்பெற்று அது அலையாக மாறி வெளியில் மீட்டுபணியில் ஈடுபடுவோரின் மன அலையோடு ஒத்து நின்று ஒத்துழைக்கும்
நம்ம ஊரில் கிணற்றிலோ அல்லது போர்வெல்லிலோ விழுந்தவுடன் முதலில் பிள்ளை அச்சப்படும் . அச்சப்பட்ட வினாடியில் அதன் உயிர்சக்தி வெளியாகிகொண்டேயிருக்கும். வெளியில் இருந்து நம்ம ஆட்கள் போடும் கூப்பாடு மேலும் நிலைமையை மோசமாக்கி ஏற்கனவே கரைந்துகொண்டிருக்கும் உயிர்சக்தியை மேலும் விரயமாக்கிவிடும்
அடுத்து தியானம் என்பது கை அசைவோ கால் அசைவோ மூச்சை கவனிப்பதோ மட்டுமல்ல அது அலைவரிசை மாற்றம். உதாரணமாக நாம் உட்கார்ந்து இருக்கிறோம். நாம் உட்கார்ந்திருப்பது ஒரு அலைவரிசை. அதாவது 13 CPS என்று வைத்துகொள்ளுங்கள். CPS என்பது cycle per second. நாம் உட்கார்ந்திருக்கும் இடத்தின் அலை சூழல் 0 முதல் 3 வரைக்கிறது என்று வைத்துகொள்ளுங்கள். உங்கள் அலைச்சூழல் 13 ல் இருந்து மூன்றாக வரும் பொழுது நீங்கள் இயற்கையாக அங்கு இருக்கும் அலைச்சூழலுக்கு செல்கிறீர்கள். அப்பொழுது நீங்கள் இயற்கையின் பாதுகாப்பு வளையத்தினுள் இருக்கிறீர்கள். உங்களுக்கு எது நன்மையோ அது மட்டுமே நிகழும். தியானம் செய்யும் பொழுது உங்கள் அலைச்சூழல் எளிதாக குறைந்து குறைந்து இந்த அலைச்சூழலுக்கு வந்துவிடும்.
அச்சமற்ற நிலை. இயற்கை அலைச்சூழலுக்கு ஏற்ப நமது அலைச்சூழலையும் மாற்றி அமைப்பதின் மூலம் உயிருக்கு எந்த ஆபத்தும் நேராமல் தக்கவைத்துகொள்ள முடியும்.
யோகமும் தியானமும் நம்ம ஊரு சொத்து என்று சொல்லிக்கொண்டு திரிகிறோம். ஆனால் அதனை முழுமையாக சீனவழி பரம்பரைதான் பயன்படுத்தி வருகிறது. நாம் நம்ம பிள்ளைகளை மேற்கத்தியை வித்தைகளில் பழக்குகிறோம்.
இது தாய்லாந்துக்கு நேர்ந்த நிகழ்வு என்று பாராமல் நாளை நம்ம பிள்ளைகளுக்கு நிகழ்ந்தால் எப்படி நிகழும் என்று யோசித்துபாருங்கள்.
பயனற்ற பயிற்சிகளில் பிள்ளைகளை சேர்க்காமல் உடல் மனம் வலிமை தரும் பயிற்சிகளில் சேருங்கள். யோகா , தியானம். நீச்சல், மலையேறுதல், முக்கியமாக இயற்கை பற்றிய அறிவு . ஏட்டு அறிவு அல்ல அனுபவ அறிவு பெற உதவுங்கள்.
தியானம் எல்லாம் பெற்று தரும்,

Friday, February 19, 2016

மொழி வழி !



மொழி சார்ந்த அரசியல்தான் தமிழ்நாட்டின் உயிர் நாடியாக இருந்திருக்கிறது. ஒரு மொழியை எதிர்த்தே ஒரு கட்சி ஆட்சியை பிடித்தது. நாற்பது ஆண்டுகாலமாக உயிர்துடிப்புடன் இருக்கிறது. ஹிந்தி மொழி திணிப்பை பற்றி சொல்லத்தான் கேட்டிருக்கிறேன். அப்பொழுது பிறக்கவில்லை என்பதால் அதை பற்றி முழுமையாக கருத்து சொல்லமுடியாது. கண்ணால் காண்பதும் பொய் ! காதால் கேட்பதும் பொய் ! தீர விசாரிப்பதே மெய் ! என்று சொல்வார்கள்.     
ஹிந்தி மொழி திணிப்பு பற்றி மூத்தவர்களை கேட்டால் அவர்கள் சொல்வதும், நூல்களை புரட்டினால் அதில் சொல்லப்பட்டு இருப்பதும் மாறுபட்டு நிற்கிறது. வரலாறு கொஞ்சம் திரிபுகள் கொண்டதுதான். தமிழ்நாட்டில் ஹிந்தி எதிர்ப்பை காண்பித்த அதே வேளையில் ஒவ்வொருவரும் கட்டாயம் ஹிந்தி படிக்கவேண்டும் என்று சொல்லியிருக்க வேண்டும். 

இந்தி மட்டுமல்ல பிறமொழி கற்கும் ஆர்வம் நம் மக்களிடையே இல்லாதது மிக ஆச்சர்யமாக இருக்கிறது. தனியார் பள்ளிகளில் படிக்கும் ஒரு சில குழந்தைகளுக்கு மட்டும் கூடுதல் மொழியாக பிரெஞ்சு, இந்தி, ஜெர்மன், ஜப்பனீஸ் போன்றவை படிக்க வாய்ப்பு கிடைக்கிறது. கிராம குழந்தைகளுக்கு ஆங்கிலமே தகினத்தோம் தான்.

ஒருவனுக்கு எத்தனை மொழிகள் தெரியுமோ அவன் அத்தனை மனிதனுக்கு சமம் என்றார் பாரதிதாசன். தமிழை உயிராக பாடிய பாட்டன் பாரதிகூட வங்கமொழி கற்று பல பாடல்களை தமிழில் மொழிபெயர்த்துள்ளான்.
இந்தி எதிர்ப்பு என்ற ஒரு நிகழ்வால் தமிழ் வளர்ந்ததோ இல்லையோ தமிழனின் தேசிய அளவிலான வளர்ச்சி மிகவும் குறைந்துவிட்டது.மத்திய அரசுப்பணிகளின் தமிழர்களின் பங்கேற்பு அருகி வருகிறது.

நமது மொழியின் சிறப்புகளை பிற மொழியில் பரப்ப வேண்டுமெனில் அம்மொழி தெரிந்திருக்கவேண்டும். ஒன்றை செயலிழக்க செய்ய வேண்டுமெனில் அதனுள் ஊடுருவ வேண்டும். ஊடுருவி நின்று பின்னர் நம் எதிர்ப்பு அலையை காண்பிக்க வேண்டும்.

இந்தியாவில் ஒரு அங்கமாகதான் தமிழ்நாடு இருக்கிறது. முடிந்தவரை பிற மாநில மொழிகளை நாம் பேசவும் எழுதவும் கற்றுக்கொள்வது அவசியம்.நாம் சுலபமாக நம் மொழியினை அவர்களுக்கு  போதிக்க, சிறப்புகளை சொல்ல முடியும். நான் பெங்களூரில் வசித்த சமயம். அங்கே திருவள்ளுவர் சிலையையும் இங்கே சர்வக்ஞார் சிலையையும் நிறுவ இருமாநில அரசியல்வாதிகளும் செயல்பட்டனர். இதன் பின்புலத்தில் பெரும் அரசியல் இருந்தது. அப்பொழுது கர்னாடாகவில் மூத்த செய்தியாளராக இருந்த ராஜாராவ் என்பவர் என்னை அழைத்தார். மூத்த என்றால் மிகவும் மூத்தவர். இதில் என்ன காமெடி என்றால்  ராஜா ராவ் தீவிர கன்னட மொழி வெறியர். பல மொழி போராட்டங்களில் பங்கேற்றிருக்கிறார். ஆனால் என்னிடம் தமிழில்தான் பேசுவார். அவர் தமிழர்களிடம் தமிழில்தான் பேசுவார்.அப்பொழுதுதான் நான் கன்னடம் பேச கற்றுக்கொண்டிருந்தேன். நான் ராஜாராவிடம் கன்னடததில் தான் பேசுவேன். என் மழலை கன்னடத்தை மிகவும் ரசிப்பார். அவ்வப்பொழுது திருக்குறள் பற்றி கேட்பார். நான் அவருக்கு முடிந்தவரை கன்னடத்தில்  விளக்கம் சொல்வேன். திருக்குறள் கன்னடத்தில் இருக்கிறது. ஆங்கிலத்திலும் படிக்க முடியும். இருந்தாலும் அந்த ஊர்க்காரன் சொல்ல கேட்கணும் அதில் ஒரு உண்மை இருக்கும் என்பார்.
      இன்று நம்ம ஊர் ஊடகத்துறையில் எண்ணற்ற வாய்ப்புகள் இருக்கின்றன. நல்ல திறமையான ஊடகவியலாளர்கள் இருக்கின்றனர். அவர்களுக்கு இந்தி மொழி பிரச்சனையாக இருப்பதால் சென்னையை தாண்டி போகமுடியவில்லை. திரைப்பட துறையில் ஒளிப்பதிவு, எடிட்டிங் என பல தொழில்நுட்ப கலைஞர்களுக்கும் இது பொருந்தும்.  ஊடகப் பணி மட்டுமல்ல இன்னும் பல பணிகளில் நம் மக்களால் ஊடுருவ முடியவில்லை. ஆனால் ஹிந்தி படித்த  கேரள, கன்னட, தெலுங்கு பேசும் மக்கள் இத்தகைய பணிகளில் சிறப்பாக இடம்பெற்றுள்ளனர்.

யார் எல்லாம் இந்தி தமிழை அழிக்கும் என்று போராடினார்களோ அவர்கள் எல்லோரும் தங்கள் வாரிசுகளை ஹிந்தியில் படிக்க வைத்துவிட்டார்கள். தயாநிதி மாறனுக்கு ஏன் டில்லியில் இந்த பிரதிநிதித்துவம் என்று கருணாநிதியிடம் கேட்டபோது அவர் சொன்னது இதுதான் “ …..ஏனென்றால் தயாநிதிக்கு ஹிந்தி தெரியும் ! “

ஹிந்தி எதிர்ப்பு என்ற பெயரில் தமிழர்கள் இந்தியா முழுவதும் ஊடுருவும் வாய்ப்பை முற்றிலும் தடுத்துவிட்டனர். திணிப்பை தடுப்பது வேறு மொழியை கற்றுக்கொள்வது வேறு.  இச்செயல் முற்றிலும் நம் மக்கள் மத்திய அரசின் பல்வேறு பணிகளில் பங்கேற்கும் வாய்ப்பை குறைத்துவிட்டது. அங்கொன்று இங்கொன்றுமாக இருக்கும் சிலர் கூட  பிராமணர்கள். அவர்களின் வலிமை சமஸ்கிருதம். எனவே சுலபமாக அவர்களால் இப்பணிகளில் சேரமுடிகிறது.
நாட்டில் மாற்றம் வேண்டும் என்று விரும்புகிறோம். மாற்றத்தை உருவாக்கும் வலிமை மிக்கவர்கள் அரசு பணியில் இருப்பவர்கள்தான். மத்திய அரசுப் பணியில் நாம் எவ்வளவுக்கு எவ்வளவு  கால் ஊன்றி நிற்கிறோமோ அவ்வளவுக்கு அவ்வளவு நாம் நம் மண்ணிற்கு தொண்டாற்ற முடியும். காமராஜர் காலத்தில் மத்திய அரசியல் தமிழன் கையில் இருந்தது. சுயநலம் இல்லாத சூழலில் எல்லா நன்மைகளையும் செய்ய முடிந்தது. இன்று மத்திய அரசியல் தமிழன் கையில் வந்தாலும் சுயநலமிகு அரசியலால் தமிழ்நாட்டிற்கு பலன் ஏதுமில்லை. தமிழ்நாட்டை முன்னேற்ற இன்னொரு வழி தமிழர்கள் மத்திய ஆட்சிப்பணிகளில் அதிகரிக்கவேண்டும். அரசு பணிகுறித்து உயரிய விழிப்புணர்வும் ஆர்வமும் மக்களிடையே பரவ வேண்டும். அரைகாசு உத்யோகம் என்றாலும் அரசு உத்யோகம் என்பார்கள். அரைகாசு இல்ல அரசாட்சியின் இதய துடிப்பே அரசு உத்தியோகம்தான்.


Wednesday, February 17, 2016

மனம் நிறைய மகிழ்ச்சி !



என்னை யார் சந்தித்தாலும் உடனே வெளிப்படுத்தும் விருப்பம் “ எனக்கும் யோகா கத்துக்கணும்னு ஆசையா இருக்கு, ஆனா டைம் இல்லை “. நான் பெரும்பாலும் இத்தகைய மனிதர்களுக்கு புன்னகையதான் பரிசளிப்பேன். அடுத்து எதற்கு யோகா கற்றுக்கொள்ளவேண்டும் என்று கேட்டால் அவர்களிடம் சரியான பதில் இருக்காது. அவர்கள் யோகா கற்றுக்கொள்ள விரும்பும் காரணம்
ஒன்று அதிக வேலை பளு அல்லது மன அழுத்தம் என்றிருக்கும்.
நான் செய்கின்ற வேலையில் திருப்தி இல்லை என்பதாக இருக்கும்.
அல்லது யோகா கற்றுக்கொண்டால் செல்வமும் , வசதியும் வந்து குவியும் என்ற நம்பிக்கை.
மூன்றுமே மனம் சம்மந்தமான பிரச்சனைதான். மனதிற்கும் உடலுக்கும் தொடர்பிருக்கிறது. நீங்கள் உடலை உற்சாகப்படுத்த செய்யும் பயிற்சி மனதை உற்சாகமூட்டும். அதற்கு யோகா உதவுகிறது. ஆனால் எனக்கு நேரமில்லை என்று சொல்லிக்கொண்டே யோகா கற்றுக்கொள்ள விரும்புவர்களை என்ன செய்ய முடியும்.
உண்மை இதுதான் ! யோகம் என்று தனியே எதுவுமில்லை. அந்த காலத்தில் வாழ்வில் உயரிய நிலையான ஞானமார்க்கத்தை தேடி அலைந்த யோகிகள் யோகம் மட்டுமே கதியென கிடந்தார்கள். ஆனால் மன்னர்களும், வணிகர்களும், இயல்பான குடிமக்களும் தங்கள் வேலையை மட்டுமே செய்துகொண்டே இருந்தனர். ஏனெனில் நமக்கு பணிக்கபட்ட பணியை செவ்வனே செய்துகொண்டிருப்பதும் சிறந்த யோகமே !

ஒரு அழகான கதை சொல்வதுண்டு.

சிவனை வேண்டி ஒரு சிவனடியாரும் அதே நேரமும் மீன்காரனும் பிரார்த்தனை செய்துகொண்டிருந்தனர். சிவனடியார் சிவாய நமஹ ! எனும் போதெல்லாம் புத்தியை எங்கோ வைத்துக்கொள்வார். மீன்காரன் மீனை வெட்டும் போதெல்லாம் மிகவும் லயித்து சிவாய நமஹ என்பான். இறுதியில் மீன்காரனுக்கு சிவனின் கிருபை கிடைத்தது.

தமக்கு விதிக்கப்பட்ட, தாம் செய்கின்ற செயலை யாரெல்லாம் விருப்பமுடன் உயிர்கலப்பு பெற்று செய்கின்றனரோ அவர்கள் எல்லாம் பொருள்துறையிலும், தொழில்துறையிலும், அருள்துறையிலும் உயர்ந்துகொண்டே இருக்கின்றனர்.

யோகா என்பது இப்பொழுது ஒரு வியாபாரபொருளாகி விளம்பரபடுத்தப்பட்டு வருவதால், இதன் மூலம் ஏதேனும் மாற்றம் நிகழுமா என்றால் நிச்சயம் நிகழும்.

உண்மையில் மற்றவர்களின் யோகா விருப்பம், திடீரென ஏற்படும் பணிச்சுமையும் மன அழுத்தமும்தான். அதற்கு காரணம் நமது மன அலைச்சூழலில் ஏற்படும் மாற்றம். அதாவது பீட்டா நிலைக்கு மனம் தள்ளப்படுவது. கொஞ்சம் விளக்கமாக சொன்னால் மன அலைச்சூழல் 13 CPS க்கு மேல் போகும் போது இந்த பதட்டம், விரக்தி, பயம், வருத்தம், கவலை, பொறாமை, எல்லாம் வரும். நீங்கள் மன அலைச்சூழலை 8 க்கு கீழே அதாவது ஆல்பா நிலைக்கு கொண்டுவந்தால் போது போயே போய்விடும். அதற்கு மிக சுலபமான வழி யோகம். யோகம் செய்ய நேரம் இல்லை என்பவர்களுக்கு சுலபமான சில பயிற்சிகள்

பயிற்சி : 1

உங்களுக்கு பிடித்தமான பாடலை ஒரு பத்து நிமிடம் கேளுங்கள். அப்பொழுது வாழ்வில் நிகழ்ந்த மகிழ்ச்சியான சம்பவங்களை அசைப்போடுங்கள். பாடலை கேளுங்கள் என்பது எல்லோரும் சொல்வதுதானே இதில் என்ன விசேஷம் என்கிறீர்களா ? அவ்வாறு கேட்கும் போது உங்கள் உடலோடு அதன் அதிர்வுகளை கலந்து உணருங்கள். தடாலடியான இசையாக இல்லாமல் கொஞ்சம் மென்மையான இசையாக இருந்தால் சிறப்பு.

பயிற்சி : 2

முடிந்தவரை நீலவானத்தை தினம் ஒரு பத்து நிமிடமாவது பார்க்க பழகுங்கள். வானிற்கு அதீத ஆற்றல் உண்டு, நாம் வானத்தை உற்றுப்பார்க்கும் போது நமக்கும் வானத்திற்குமிடையே ஒரு இணைப்பு ஏற்படும். நம் உடலில் உள்ள அழுத்தங்கள் கரைந்து கரைந்து உடலும் மனமும் மென்மையாய மாறும். விண்ணின் காந்த ஆற்றல் அப்படி.

பயிற்சி : 3

எதுவும் இல்லையெனில் கண்களை மூடி மூச்சையே இயல்பாக எந்தவித அழுத்தமும் தராமல் கவனியுங்கள். பிறகு கொஞ்ச நேரம் கழித்து உடலில் ஒவ்வொரு அங்கமாக நினைவுக்கு கொண்டு வாருங்கள். அவ்வாறு செய்யும் போது மூச்சையும் சீராக இழுத்தபடி நினைவில் கொண்டபடி செய்யுங்கள்.

இது எதுவுமே  ஒர்க் அவுட் ஆகவில்லையா பைக்கை எடுத்துகொண்டோ அல்லது ஒரு பத்து நிமிட நடை பழகுங்கள்.  நாம் அலுவலகம் என்ற பெயரில் எட்டு மணி நேரம் ஒரே இடத்தில் அழுந்திகிடப்பதும் கூட இந்த பிரச்சனைக்கு காரணமாகிறது. எதை செய்தாலும் விருப்பமுடன் செய்யும்போது மன அலைச்சூழல் குறையும். ஈர்ப்பு சக்தி மேம்படும். திறன் அதிகமாக வெளிப்படும். அப்புறம் என்ன உயர்வும் பாராட்டுக்களும்தான். உயர்வு என்றால் பொருளாதாரத்தையும் சேர்த்துதான்.


.

Sunday, February 14, 2016

மக்கள் நல கூட்டணி ?

மக்கள் நல கூட்டணி உருவான போது அதைப்பற்றிய ஒரு கருத்து பொதுவெளியில் விவாதிக்கப்பட்டது. அதிமுகவின் எதிர்ப்பு ஓட்டுக்களை திமுகவின் பக்கம் போகாமல் திசைதிருப்ப உருவாக்கப்பட்ட அணிதான் மக்கள் நலக் கூட்டணி என்பதுதான் அது.
அதற்கு வைகோ ஒரு மறுப்பு தெரிவித்தார். அதிமுகவும் திமுகவும் தங்கள் பொது எதிரி என்றார். சமீபத்தில் ஒரு வார இதழுக்கு அளித்த பேட்டியில் விடுதலை சிறுத்தைகள் தலைவர் திருமாவளவன் அதிமுக என்பது தலித்துக்கள் வாக்கு வங்கி நிறைந்த கட்சி. மக்கள் நலக்கூட்டணியில் தானிருப்பதால் அதிமுகவின் வாக்கு வங்கி சரியும் எனவே அதிமுகவுக்கு தான் பாதிப்பு என்றார். கம்புயூனிஸ்டுகள் கொஞ்சம் மழுப்பலாகவே பதிலளித்தார்கள். தங்கள் அணி வலிமையானது என்று செல்பி எடுத்து    நல்கினாலும்,வலுசேர்க்க கூட்டணியில் உள்ள எல்லோருக்கும் விஜயகாந்த வந்தால் நன்றாக இருக்கும் என்ற விருப்பம் இருப்பது தெரிகிறது.
அரசியல் அரிச்சுவடி பழகாத ஒருவனுக்கு கூட தெளிவாக தெரியும் திமுக மற்றும் அதிமுகவுக்கு மாற்றாக தமிழ்நாட்டில் வலிமையான ஒரு அமைப்பு இன்னும் உருவாகவில்லை என்பது. அப்படி இருக்க மக்கள் நலக்கூட்டணியால அதிமுகவின் எதிர்ப்பு ஓட்டுக்கள் பிரியுமே தவிர அதனால் புதிய அலையெல்லாம் உருவாகாது. இதனை வலிமைப்படுத்தும் வகையில் சமீபத்தில் வெளியான வைகோவின் பேட்டி அமைகிறது.
எதற்குமே ஒரு மையபுள்ளி ( Centre Point )  அவசியம். மக்கள் நல கூட்டணின் மையப்புள்ளியாக அதிமுக மற்றும் திமுகவிற்கு மாற்றான ஒரு அரசியல் களம் முன்வைக்கப்பட்டது. தற்போது வைகோ பேட்டியில் அதிமுக – திமுக அரசியல் ரீதியாக போட்டியிட்டு முட்டி மோதிக்கொள்ளுங்கள் ஆனால் திராவிட அரசியலை கைவிட்டுவிடாதீர்கள் என்று கிளைதாவி இருக்கிறார். அதாவது தமிழ்நாட்டில் அரசியல் மாற்றம் என்பதில் இருந்து இறங்கி, யார் ஆண்டால் எனக்கென்ன இங்கு தேவை திராவிட அரசியல் என்பதாகும். தமிழ் தேசியம் பேசி வரும் சீமானுக்கு எதிரான பதிலாக அவர் சீமானை ஒரு வலிமையான தமிழ் தேசியவாதியாக அடையாளப்படுத்தியிருக்கிறார். இந்த வகையில் வைகோவிற்கு சீமான் நன்றி சொல்லவேண்டும். இதுவும் ஒருவகையில் திசை திருப்பல்தான். சீமானுக்கு நன்றாக தெரியும் தன்னால் தனித்து நின்று ஆட்சியைப்பிடிக்க முடியாது என்பது. மேலும் அவர் உடனடியாக அதற்கு அவசரப்படுவதாகவும் தெரியவில்லை. துணிந்து 234 தொகுதிகளிலும் தன் வேட்பாளர்களை அறிவித்து உள்ளார். அவரின் வாக்குறுதிகள் இளைஞர்களை கவரும் வகையில் உள்ளன. இந்த தேர்தலில் தனது தனிப்பட்ட அரசியல் வலிமையை சோதிக்க பயன்படுத்திகொள்வார். இன்னும் சில ஆண்டுகளில் ஏற்படபோகும் ஒரு வெற்றிடத்தை நோக்கி இருக்கிறது அவர் பயணம்.மேலும் வைகோவின் பேட்டி சீமானுக்கு வலிமை சேர்ப்பதாக அமைந்துவிட்டது.
அதிமுக திமுக இரண்டிற்கும் இடையேயான அரசியல் சூடு பிடிக்கதொடங்கிய நிலையில் அதன் எதிர்ப்பு வாக்குகள் மக்கள் நல கூட்டணி, பாமக,நாம் தமிழர் என திசை திரும்பி நீர்மூலமாகிவிடும். பாமக் கொஞ்சம் நாள் காத்திருந்து பார்த்து தன் இலக்கை 2021 ஆக மாற்றிக்கொள்ளகூடும். திருமாவளவனுக்கு உட்சபட்ச எதிர்ப்பார்ப்பு மக்கள் நல கூட்டணியின் முதல்வர் வேட்பாளராக தான் அறிவிக்கபட்டால் போதும் என்பதே. இத்தனை கால அரசியல் களத்தில் இதுவரை ஒரு தலித் முதல்வர் வேட்பாளராக முன்னிறுத்தப்பட்டதில்லை. அவ்வாறு முன்னிறுத்தினால் பாமகவிற்கு எதிரான வெற்றியாகவும், அவ்வாறு முன்னிறுத்தப்படுதலே தலித்திற்கான வெற்றியாகவும் அவர் கருத கூடும். ஆனால் அத்தகைய திறந்த மனது மக்கள்நல கூட்டணிக்கு உள்ளதா என்பதை யாரும் வெளிப்படுத்தவில்லை.

திடீரென குலாம் நபி ஆசாத் கலைஞரை சந்திக்க காங்கிரஸுடன் கூட்டணி உருவாகிவிட்டதாக அதிகாரபூர்வமற்ற தகவல்கள் உலாவுகின்றன. கலைஞர் அவ்வளவு சாதாரணமானவர் அல்ல. நின்று விளையாடுவதில் வல்லவர். குலாம் நபி ஆசாத் சந்திப்பை பரபரப்பாக்கி கூர்ந்து கவனிக்க தொடங்கியிருக்கிறார். இந்த சந்திப்பிற்கு அவர் எத்தகைய முக்கியத்துவம் தருகிறார் என்பதற்கு முகநூலி உலக வரலாற்றிலேயே முதன்முறையாக திமுக நேரலை செய்தது. இப்பொழுது காங்கிரஸுடன் நெருங்கினால் பாஜக சுலபமாக அதிமுகவுடன் நெருங்கிவிடும். அப்புறம் கலைஞரை இறுக்குவது அவர்களுக்கு ஒன்று கடினமல்ல. உண்மையில்  அரசியல் சதுரங்கத்தின் முதல் நகர்வு இப்பொழுதுதான் துவங்கியுள்ளது.  

Saturday, February 13, 2016

எல்லா உயிர்களும் இன்புற்று வாழ்க


இது இந்தியா !
சில நாட்களுக்கு முன் வாட்ஸ் அப்பில் வந்த ஒலி ஒளிக் காட்சி. அது ஒரு அடர்ந்த வனப்பகுதி. நடுவில் பெரும் சாலை. புகையைக் கக்கிகொண்டு ஒரு கார் அந்த சாலையில் விரைகிறது. திடீரென்று விர்ரென்று ஒரு சத்தம். காரின் பின்புலத்தில்  இருந்து புகை காற்றில் கரைய அந்த காட்சி நம் இதயத்தில் இரத்த ஓட்டத்தை உறைய செய்கிறது.
பிறந்து சில வாரங்களே ஆன பால்மனம் மாற சிறிய குரங்கு குட்டி. மூக்கில் இருந்து இரத்தம்  கசிய கண்கள் விண்ணை நோக்கி அசைவற்று நிற்க சிறிது சிறிதாக அடங்கிகொண்டிருந்தது. அதன் பார்வை என்னை ஏன் இந்த மண்ணில் படைத்தாய் இறைவா என்று பார்ப்பது போல் ஒரு பாவனை.
ஒரு சில வினாடிதான் தாய் குரங்கு எங்கிருந்தோ குதித்தது. சிறிதுசிறிதாக அடங்கிகொண்டிருந்த பிள்ளைக்குரங்கினை இரு கைகளால் அணைத்து இதயத்தோடு இதயமாக தன் இதய துடிப்பை அதனுடன் பாய்ச்ச முயன்றுகொண்டிருந்தது. பாவம் அது ஒன்றும் தெய்வபிறவியில்லையே. கேவலம்  ஒரு குரங்கு ! அதனால் தன் இதயத்துடிப்பை தந்து தன் பிள்ளையின் இதயத்துடிப்பை உயிர்ப்பிக்க முடியவில்லை.  சினம் கொண்டு எழமுடியவில்லை.  கும்பல் சேர்த்து அடுத்து வரும் வாகனத்தின் மீது கல் எறியவோ, கொளுத்தவோ தெரியவில்லை.
குந்தி தேவி தன் மகன் கர்ணனின் உடலை மடியில் கிடத்தி கதறுவதை போல, அந்த குரங்கும் தன் மடியில் உயிர்துறக்கும் பிள்ளையை கையாலாக தாயாக கண்களில் நீர் துளிர்க்க சுற்றும் முற்றும் பரிதவிப்புடன் பார்க்க தூரத்தில் விரைந்த வாகனம்  எதைப்பற்றியும் கவலையின்றி கார் ஜன்னல் வழியாக குடித்து முடித்த பீர் பாட்டில்களை இரைத்தபடி அகோரமான ஓசையுடன் விரைந்து மறைந்தது.
இதுதான் நாம் நம்முடன் வாழும் விலங்குகளுக்கு தரும் மரியாதை.

இது சிங்கப்பூர்
சிங்கப்பூர் மத்திய வனப்பகுதியையும் புக்கிட் திமா வனப்பகுதியையும் இணைக்கும் விரைவு சாலை.  சாலையில்   அதிவேகமாக வாகனங்கள் விரைந்து கொண்டிருக்க சாலையின் மேற்பகுதியில் இயற்கையோடு இயற்கையாக அமைக்கப்பட்டிருக்கும் பசுமைபாலம். அதன் மீது எந்தவித அச்சமும் இன்றி இயல்புவாழ்க்கை பாதிக்காத வகையில் விலங்கினங்கள் விளையாடி செல்கின்றன. சாலை விபத்தில் ஒரு விலங்கும் இறந்ததாக குறிப்புகள் இல்லை.
சீனர்கள் அதிகம் வசிக்கும் சிங்கப்பூரில் அசைவ உணவு என்பது மிக சாதாரணம். உணவுக்காக உயிரைகொல்பவர்களாக இருப்பினும் பிற உயிரின் மதிப்பை உணர்ந்தவர்களாதலால் சுமார் 17  மில்லியன் டாலர் மதிப்பில் அதாவது நூற்றி இருபது கோடி செலவில் இப்படி அற்புதமான ஏற்பாட்டை செய்துள்ளனர்.
சிங்கப்பூர் மட்டுமல்ல ஐரோப்பா ,அமெரிக்கா போன்ற மேனாடுகளில் இத்தகைய பாலங்களை அதிகம் காணலாம். ஆனால் இந்த நாடுகளை விட  இந்தியாவிற்கு பல சிறப்புகள். உலகிலேயே அரிய விலங்கினங்களும், பறவைகளும் நிறைந்த நாடு. ஆனால் இதனை எப்படி பாதுகாப்பது என்பது நமக்கு தெரியாமல் இருப்பதுதான் நம் பலவீனம்.
இரண்டாண்டுகளுக்கு முன்பு தினமணியில் வந்த ஒரு செய்தி. அதாவது 2013 ல் மட்டும் சுமார் 1600 விலங்குகள் திருச்சியை சுற்றிய  பகுதிகளில் பாதிக்கப்பட்டிருக்கின்றன.  இது திருச்சிக்கு மட்டுமேயான புள்ளிவிவரம் இந்த மூன்றாண்டுகளில் மாநிலம் முழுவதும் ஏன் நாடு முழுவதும் கணக்கிட்டு பாருங்கள். இதையெல்லாம் கணக்கிட்டு பார்க்க கூட நம் ஊரில் நாதியில்லை.
பள்ளிக்கரணை சதுப்புநிலப்பகுதியில் ஆற்றுக்கு குறுக்கே ஒரு சாலை அமைக்கப்பட்டுள்ளது. இருபுறமும் ஏரிகள் இருக்க, பாம்போ ,பல்லியோ, தவளையோம்ஒரு பகுதியில் இருந்து இன்னொரு பகுதிக்கு போகவேண்டுமெனில் இந்த சாலையை தான் கடக்க வேணும். அதிகாலையில் நீங்கள் இங்கு பயணித்தால் எத்தனை உயிர்கள் இங்கு அடிப்பட்டு கிடக்கின்றன என்பதை காணமுடியும்.
தவளையும் பாம்பும் இறந்தால் நமக்கென்ன என்று நினைக்கவேண்டாம். இவை எல்லாம் சுற்றுசூழலின் பாதுகாவலர்கள். இவற்றின் எண்ணிக்கை குறைய குறைய மனிதனின் ஆயுள் நிலையும் குறைந்துகொண்டே வரும். ஏன் இந்த பூமியின் தட்பவெட்பநிலையும் கூட மாறும்.
இவற்றை மாற்றி அமைக்க ஒரே வழி. நமக்குள் நாமே விழிப்புணர்வு ஏற்படுத்துவதுதான். முடிந்தவரை காடுகளில் ஊடே பயணிக்கும் போது மிகவும் கவனமாக பயணிப்பது. வாய்ப்புள்ள பெருநகரங்களில் மக்களிடையே விழிப்புணர்வு ஏற்படுத்துவது. பெரும் கார்பரேட் நிறுவனங்கள் மனசு வைத்தால் இத்தகைய பாதைகளில் சிங்கப்பூரிலும் ஐரோப்பாவில் இருப்பதை போன்று நம்மூரிலும் பாலம் அமைத்து விலங்குகளுக்கு உதவலாம்.
பள்ளிக்கரணை பகுதியை சுற்றி எத்தனையோ மென்பொருள் நிறுவனங்கள் உள்ளன. அந்த பகுதி நிறுவனங்களும், ஏன் மென்பொறியாளர்களும் மனது வைத்தால் இயற்கையை துண்டாடி  உயிரனங்களை துண்டாடிக்கொண்டிருக்கும் அந்த சாலையின் மத்தியில் ஒரு இயற்கை பாலம் அமைக்க முடியும்.
இத்தகைய விடயங்களை முன்னிறுத்தி நாடு முழுவதும் விழிப்புணர்வு செய்ய கோவையை சேர்ந்த Environmental Conservation Group  முகம்மது சலீம் என்பவரின் தலைமையில் நாடெங்கும் ஒரு சுற்றுப்பயணம் மேற்கொண்டு வருகிறது. பள்ளிக்கல்லூரிகளில் விழிப்புணர்வு பிரச்சாரம் செய்தல். காடுகளில் விளம்பர தட்டிகள் வைத்தல் என தொடர்கிறது இவர்களின் பயணம். இது ஒரு சிறு தீப்பொறிதான். இது மேலும் மேலும் பரவி வெளிச்சமாக வேண்டும் அந்த வெளிச்சம் நாம் ஒவ்வொருவரின் இதயத்தில் இருந்தும்  ஒளிரவேண்டும்.




Sunday, December 13, 2015

குப்பையும் குன்றிய மனநிலையும்



சீரியஸுக்கும் காமெடிக்கும் ஒரு மெல்லிய கோடு இருக்கிறது.
இங்கிருந்து தாண்டினால் சீரியஸ் காமெடியாகிவிடும்.காமெடி சீரியஸாகிவிடும்.  பீப் பாடல் என்ற வஸ்து நல்லவேளை சிம்புவோடு போயிற்று. சிம்புவின் எல்லா செயல்களுக்கும் சொம்பு தூக்கும் அவரின் அப்பாவும் இதில் இணைந்து தந்தையும் மகனும் மாறி மாறி பாடியிருந்தால் என்ன ஆகியிருக்கும் . யோசித்துப் பாருங்கள் !
ஐந்து இந்திரியங்களின் பணி அதனால் சில இன்பங்களை  துய்த்து முழுமை பெறுவதே.
நல்ல செயல்களை பார்க்க கண்கள்.
நல்லதை நுகர நாசி
நல்லதை பேச வாய்
நல்லதை சுவைக்க நாக்கு
இப்படியிருக்க …எப்பொழுதும் மனித மனதை சுழன்றடிக்கும்  ஒன்று.
செக்ஸ் ! செக்ஸ் ! செக்ஸ் !
எங்கும் எதிலும் செக்ஸ்.
அதிலிருந்து வந்ததின் காரணமோ என்னவோ அதையே பற்றி தொங்கிகொண்டிருக்கிறது இந்த சமூகம். மிருகங்கள் கூட உணர்வுக்கு உட்படும் போது மட்டுமே செயல்படுகின்றன. ஆனால் மனிதனுக்கு மட்டும் சதா நேரமும் இதுதான் சிந்தனையாக இருக்கிறது என்று நினைக்கிறேன்.
முப்பத்தியிரண்டு வயது பையனும். இருபத்தியொரு வயது பையனும் இணைந்து ஒரு பாடலை வெளியிட்டு இருக்கிறார்கள். பீப் சாங்க்  (Beep Song )  என்று அதற்கு பெயரிட்டுள்ளார்கள். பீப் ( Beep ) என்ற ஓசை வருவதால் அதற்கு பீப் சாங் என்ற பெயரா அல்லது மேனாடுகளில் நிகழும் பீப் ஷோ ( Peep Show ) எனப்படும் பாலியல் நேரிடைக்காட்சியில் இருந்து எடுக்கப்பட்ட ( Peep ) என்ற வார்த்தையா என்று விளங்கவில்லை.
 வெள்ளம் மழை சோகம் என வதங்கிக்கொண்டிருந்த கூட்டத்தின்  சிந்தனையை திசைதிருப்பும்  அவலாக அமைந்திருக்கிறது இந்த பாட்டு.
அடுத்த முதல்வர் சகாயம் என்று கூக்குரலிட்ட இளைய கூட்டத்தின் ஒரு பிரிவினர் கூட இரண்டாக பிரிந்து ஒன்று இந்த பாடலுக்கு ஒத்திசையும் இன்னொன்று எதிர்ப்பு தாரணியும் பாடிக்கொண்டிருக்கிறது.
பாலுணர்வை மிக  உயர்வாக சொன்ன சமயம் நம்முடையது. இதில் பிறந்த நாம் தான் அந்த போற்றுதலுக்குரிய  பாலியலை கேவலப்படுத்திக் கொண்டிருக்கிறோம்.
தனிமனித ஒழுங்கீனம். சமுதாயத்தை  புற்றாக பீடித்துள்ளது.
தனிமனித அழுத்தத்தின் வெளிப்பாடு இன்றுதான் வெளிப்படுகிறதா ?
அப்பொழுது நான் ஒரு பள்ளி மாணவன். தூர்தர்ஷன் மட்டும்தான் தொலைகாட்சி. எங்கள் வீட்டின் அருகே மணியக்கார தாத்தா வீட்டில் ஒரு டிவி இருந்தது. பள்ளியில் இருந்து திரும்பியவுடன் மாலை வேலையில் கிரிக்கெட் மேட்ச் பார்ப்பது பொழுதுபோக்கு. சூடேற்றும் கிரிக்கெட் மேட்ச் இடையே ஒரு விளம்பரம் ஒளிபரப்பப் படும்.
அது ஷேவிங் லோஷன் விளம்பரம். கடலில் ஒரு பாய்மரம் விடும் அழகன். ஒரு குறிப்பிட்ட ஷேவிங் லோஷனை பூசி ஷேவ் செய்துக்கொள்கிறான். அடுத்த வினாடி வட்டுடையில் ஒரு அழகான இளம்பெண் அவனுடன் ஜல்லியடிக்கிறாள். ஒரு சூழலில் கிரிகெட்டை விட அந்த விளம்பரம் எப்பொழுது போடுவார்கள் என்ற ஆர்வம் அதிகரிக்க தொடங்கிவிட்டது. அப்பொழுது தோணவில்லை ஷேவிங் கிரிமிற்கும் பெண்ணிற்கும் என்ன சம்மந்தம் என்று.
இப்படி விளம்பரங்கள், திரைப்படங்கள், தொலைக்காட்சித் தொடர்கள், புத்தகங்கள் என பாலுணர்வை திணித்து ஒரு கிளுகிளுப்பாக்கி அதன் மூலம் லாபம் பார்க்கும் போக்கு தொன்று தொட்டே வருகின்றது.

பெண்ணின் பெருமைகளை ஆயிரம்தான் பேசினாலும் இன்னும் அவர்களை போக பொருளாகவே பார்க்கும் குரூர போக்கில் மாற்றமில்லை.

இவையெல்லாம் இணைந்து ஒரு சீர்பிடித்த சமூக எண்ணத்தை ஆழமாக ஊன்றிவிட்டன.
எண்ணத்திற்கும் உடலுக்கும் தொடர்பு இருக்கிறது. ஆரோக்கியமான உடலே ஆரோக்கியமான மனம். ஆரோக்கியமான உடல் என்பது இரத்த ஓட்டம்,வெப்ப ஓட்டம், காற்றோட்டம், உயிரோட்டம் சீர்பட்ட ஜீவகாந்தம் எனும் ஆற்றல் எப்போழுது உற்சாகமாக ஓடிக்கொண்டிருக்கும் நிலை.
உடலில் ஜீவகாந்தம் நிரம்பியிருந்தால் மனதில் ஆரோக்கியமான உற்சாகம் எப்பொழுதும் நிரம்பியிருக்கும்.
உடல் ஆரோக்கியத்திற்கு நல்ல உடற்பயிற்சி அவசியம். உடற்பயிற்சி என்றவுடன் ஜிம்மிற்கு சென்று சிக்ஸ் பேக் உருவாக்கிகொள்வதல்ல. உடலை மிதமாக்கும் காற்றை போன்று மென்மையாக்கும் யோகா போன்ற அப்பியாசங்கள்.
தம் பிள்ளையை டோனி போன்று கிரிக்கெட்டர் ஆக்கவேண்டும் அல்லது சானியா மிர்சா போன்று டென்னிஸ் வீரராக மாற்றவேண்டும் என்று நினைக்கும் பெற்றோர்களில் எத்தனை பெற்றோர்கள் இயற்கையான முறையில் தம் பிள்ளைகள் ஆரோக்கியம் பெறவேண்டும் என்று விரும்புகிறார்கள்.
சூப்பர் சிங்கர்களுக்கும், மானாட மயிலாடவிற்கு தயார் செய்யும் ஆர்வம் உண்மையான ஆரோக்கியமான உடல்வாகிற்கு தயார் செய்ய விரும்புவதில்லை.
உடல்தான் இப்படி என்றால் மனம் ஒரே குப்பை. இன்று நேற்றல்ல பல ஆண்டுகளாக சேர்ந்த குப்பையெல்லாம் தங்கள் மனதில் சுமந்து பின்னர் தங்கள் பிள்ளைகள் மனதிற்கு கடத்துகிறார்கள்.
திருமணம் பொருத்தம் பார்ப்பதில் இருந்து சாந்தி முகூர்த்தம் பிள்ளைப் பேறு என எல்லாவற்றிற்கு அறிவியல் பூர்வமாக நேரம் வகுத்து கொடுத்தது சித்தர் பாரம்பர்யம். ஏன் ? வாழையடி வாழையாய் சமூகம் ஒரு ஆரோக்கியமான கட்டுக்குள் அமையவேண்டும் என்பதால்தான். ஆனால் அதனை மூட சடங்காக்கிவிட்டு வீடு, கார், சம்பளம் இது பொருந்தினால் போதும் என்ற மனநிலையில் முதல் பிழை.
நேரம் காலம் பார்க்காமல் சல்லாபித்து அதனால் உருவாகும் கருவும் கூட களங்கமான மனோபாவமுடன் அமையும் என்பதை அறிந்துகொள்ள எத்தனை பேருக்கு ஆர்வம் இருக்கிறது. ஆண் பெண் இணையும் முன்பு தங்களுக்குள் உள்ள அனைத்து கெட்ட பதிவுகளையும் அழித்து பின்னர் இணையும் போது  உருவாகும் கரு  வளமான எதிர்காலத்திற்கு உரமாகும்.
கல்விமுறை இன்னொரு சீர்கேடு. வாழ்வியலை தவிர மலிவான வியாபார யுக்திமட்டும்தான் இன்றைய கல்வியின் வடிவம்.
இயல்பாக சென்று கொண்டிருந்த திரையுலகில் டி.ராஜேந்திரின் பிரவேசம் கொஞ்சம் நகைச்சுவையாகதான் தெரிகிறது. நான் நாயகிகளை கட்டி பிடிக்க மாட்டேன். ஆபசமாக படமெடுக்கமாட்டேன் என்று ஊருக்கு  உபதேசம் செய்து ஒரு குப்பையை பெற்றிருக்கிறார். நிச்சயம் சிம்புவிடம் வெளிப்படுவது டி.ராஜேந்தர் என்ற உத்தம கலைஞனின் பதிவுகள்தான்.
என் பாத்ரூமில் நிகழ்ந்தது என்று சிம்பு என்ன சொன்னாலும் பாத்ரூமிற்கு கதவு போடாமல் போனது அவரின் தவறல்லவா. பாத்ரூம் என்பது உடலை சுத்திகரித்துகொள்ளும் இடம். அங்கு அவர் மீண்டும் அழுக்கையல்லவா பூசிக்கொண்டிருந்திருக்கிறார்.

எதிர்பார்ப்புகளில் தோல்விகள் சகஜம்.

உடனே அதிலிருந்து மீளத்தெரிந்திருக்கவேண்டும். காதல் என்பது வெறும் உடல்கவர்ச்சி என்ற சித்தாந்தம் என்றும் நிலைப்பெற்றதில்லை. சிம்புவும் – அனிருத்தும் பிஞ்சியில் பழுத்த பழம் என்பதை நான் சொல்லித் தெரிந்து கொள்ளவேண்டியதில்லை.

பள்ளிக்கு சென்று ஒழுக்க நெறி கற்கவேண்டிய வயதில் குழந்தை நட்சத்திரமாக ஆடவிட்டு அழகு பார்த்த டி.ரஜேந்தரின் வளர்ப்பு பிழையே சிம்பு. 

இருபத்தியொரு வயதில் தான் ஏ.ஆர்.ரகுமானும்  அறிமுகமானார். முதல் படத்திலேயே தேசப்பற்றும், அன்பையும் பறிமாறியது அவரின் இசை. 

கொலைவெறி எனும் குப்பையுடன் அறிமுகமான அனிருத் மேலும் மேலும் குப்பையை கிளறிக்கொண்டிருக்கிறார்.

இவர்கள் மீது வழக்கு போடலாம். நீதிமன்றத்திற்கு அலைகழிக்கலாம். அதனால் இவர்களின் மன அழுத்தம் மேலும் மேலும் அதிகரிக்குமே தவிர மாற்றம் இராது.

சிம்புவுக்கு அனிருத்திற்கும் தேவை உடனடி உளவியல் சிகிச்சை. இவர்கள் போகவேண்டியது நீதிமன்றம் அல்ல. மனநல மருத்துவமனை.

இது சிம்புவுக்கும் அனிருத்திற்கும் மட்டுமல்ல. முறையற்ற நிலையில் எந்த ஒரு எழுச்சிநிலை ஏற்பட்டாலும் அகத்தாய்ந்து நீக்கும் மனோநிலை எல்லோருக்கும் வரவேண்டும். தேவைப்பட்டால் மன நல ஆலோசகரை அணுகுவது கூட தவறில்லை.

பரஞ்சோதி மகான் எனும் ஒரு ஞானி. வில்லிபுத்தூரில் பிறந்து பர்மாவில் வாழ்ந்தவர். பிறப்பால் இசுலாமியர்.  ஆன்மிக ஈடுபாட்டில் உயர்ந்து குண்டலினி யோகத்தை எளிமைப்படுத்தி  உலக சமாதான ஆலயம் எனும் அமைப்பை தோற்றுவித்து எல்லோருக்கும் போதித்து வந்தார்.  வேதாத்திரி மகரிஷியின் குரு இந்த ஞானவள்ளலதான். மிக சாமனிய மனிதர்களுக்கு எல்லாம் உயரிய உபதேசங்களை எந்த எதிர்பார்ப்புமின்றி கற்றுத் தந்தார். ஒருநாள் மிக சாமனியன் ஒருவன் தீட்சை பெரும் போது சுவாமி  தவநிலையில் நீங்கள் சொல்லும்  உச்சநிலை எப்படியிருக்கும் என்று கேட்டார். அந்த எளியவனுக்கு எளியமுறையில் விளக்க முயன்ற பரஞ்சோதி மகான் “ நீ உன் மனைவியுடன் சல்லாபிக்கும் போது உச்சநிலையை அடையும் போது உனக்குள்  ஒரு உணர்வு வெளிப்படும் அல்லவா அதுவே தவத்தின் உச்சநிலை “
”அப்படின்னா ! ரெண்டும் ஒண்ணா சாமி “ என்று சாமனியன் வினவ
“ஆமாம்பா ! சல்லாபத்தில்  உன்னிடம் ஒரு சிலவினாடி மட்டுமே நிற்கும்…தவத்தில் நீ விரும்பும் வரை அந்த உணர்வை நிறுத்தி வைத்துக்கொள்ளலாம் அதனால் தான் அது சிற்றின்பம்….இதற்கு பேரு பேரின்பம் “ என்றார்.
செக்ஸை தெய்வீகமாக பார்த்த மண்ணில் அதை சாக்கடையாக்கி நாற்றமெடுக்க செய்கிறது இத்தகைய செயல்கள்.

உடனடி தேவை தனிமனிதனுக்கும் சமுதாயத்திற்கும் மனநிலை சிகிச்சை.




Saturday, February 7, 2015

டாஸ்மாக்கும் - ரியல் எஸ்டேட்டும்



குடிப்பழக்கத்தில் இருந்து மீளமுடியாமல் இரண்டு மாணவர்கள் தற்கொலை என்ற செய்தியின் ஈரம் இன்னும் காயவில்லை. அதற்குள் இன்று என்னை டாஸ்மாக் ஒன்றிற்கு விஜயம் செய்யும் வாய்ப்பை வழங்கிவிட்டது இறைநிலை.

இதை மக்கள் முதல்வரின் வார்த்தைகளில் சொல்லவேண்டுமெனில் மதியும் விதியும் இணைந்து  எனக்கு எதிராக செய்த சூழ்ச்சி இது !


தமிழனையும் சினிமாவையும் எப்படி பிரிக்க முடியாதோ அதே போன்று டாஸ்மாக்கையும் ரியல் எஸ்டேட்டையும் பிரித்துப் பார்க்க முடியாது என்று நினைக்கிறேன்.

ஒன்று உடல்நலத்தை அழிக்கிறது.
இன்னொன்று வேளாண்மையை அழிக்கிறது. இரண்டிலும் சம்மந்தப்பட்ட உறவுகளும்,நட்புகளும் நம்மை சூழ்ந்து வாழ்வதால் இவ்விடங்களுக்கு சந்தர்ப்ப சூழலினால்  போக வேண்டியிருக்கிறது.
ரியல் எஸ்டேட்டின்பெரும்பாலான முக்கிய வர்த்தக பேச்சுவார்த்தைகள் டாஸ்மாக் வளாகத்தில் தான் முடிவாகின்றன. ரியல் எஸ்டேட் மட்டுமல்ல பல வர்த்தக முடிவு மையங்கள் டாஸ்மாக்கு தான்.

எனக்கும் பெரியபாளையம் வழிச் சாலைக்கும் கிட்டத்தட்ட பத்தாண்டுக்கு மேலான தொடர்பு இருக்கின்றது. எனக்கு வேண்டிய முக்கிய நபர் ஒருவர் அங்கு இறால் பண்ணை வைத்திருந்தார்.

சனி ஞாயிறு மாலை வேளைகளில் இறால் பண்ணை தான் என் பொழுது போக்கு. அப்போது அந்த நிலத்தை சுற்றி பெரும் பசுமைவெளி படர்ந்திருக்கும். பார்ப்பதற்கே ரம்மியமாக இருக்கும். இப்போது அந்த நிலங்கள் எல்லாம் முற்றிலும் அழிந்துவிட்டன. பல பசுமைவெளிகள் காம்பவுண்ட் சுவருக்குள் கிடங்குகளாக சுருங்கிவிட்டன.

அதன் நிலப்பிரபுக்களாக, உரிமையாளர்களாக வலம் வந்த விவசாயிகள் இருப்பதையெல்லாம் தொலைத்துவிட்டு டாஸ்மாக் வளாகத்தில் சுருண்டு கிடப்பதை நேரிடையாக பார்க்கிறேன்.

வேளாண்மை அழியும் போது அந்த தேசமும் அழிந்துகொண்டிருக்கிறது என்பதற்கு டாஸ்மாக்கினுள் விழுந்து கிடக்கும் இந்த மக்களே சாட்சி.


குடி என்பது கொண்டாட்டமான நிகழ்வாகதான் உலகமெங்கும் இருக்கின்றன. ஆனால் தமிழ்நாட்டில் மட்டும்தான் குடியை கெடுக்கும் கேடான செயலாக மாறியிருக்கிறது.

எனது பத்தாண்டிற்கு மேலான பெங்களூர் வாசத்தில் சொன்னால் நம்ப மாட்டீர்கள், Bar புகழும் பெங்களூரில் ஒருவரை கூட குடித்துவிட்டு பாரில் விழுந்து கிடந்து பார்த்தது இல்லை.

குடிப்பவர்கள் எல்லாம் கெட்டவர்கள் என்ற பிம்பத்தை உடைத்தது பெங்களூர்தான். அதுவும் கெட்டப்பெண்கள் தான் குடிப்பார்கள் என்று சினிமாவை பார்த்து நம்பிக்கொண்டிருந்தேன். குடிப்பதற்கும் குணாதிசயத்திற்கும் தொடர்பில்லை என்று தெளிவானது இங்குதான்.

நான் பெங்களூருக்கு சென்ற நான்காவது மாதமே எனக்கு அந்த அதிர்ச்சி காத்திருந்தது. எனது பிறந்த நாளை தெரிந்துகொண்டு வாழ்த்து சொன்ன என் ஜூனியர் பெண்ணொருத்தி “ சார் ! எப்போ எங்களுக்கு ட்ரீட் ! “ என்றாள்

மதியம் ! என்றேன் “

மதியமாவே...நோ....நோ...சார்..... ஆபிஸ் முடிஞ்சி ஆறுமணிக்கு மேலே “ என்றாள்.

கிராமத்து அப்பாவியான எனக்கு மதியம்னா நல்லாவே வயிறு நிறைய ஒரு பிரியாணி வாங்கி கொடுத்துவிடலாம். ஆறுமணிக்குன்னா டிபன் தானே இருக்கும் ,பாவம் அந்த புள்ளைக்கு வயிராற சோறு போட முடியாதே ! என்ற யோசனை.

ஆறு மணி ஆனதும் தான் உண்மை தெரிந்தது.

நான் பக்கத்தில் இருக்கும் சாகர் ஹோட்டலுக்கு போகலாம் என்று சொல்ல, அவள் என்னைப் பார்த்து நக்கலாக சிரித்தபடி

சார் ! சாகர்ல பீர் கிடைக்காது....Will go to beer cafe mg road or to pressclub cubbon park “ என்றாள்.

எனக்கு அதிர்ச்சியாக இருந்தது.

சே...சே....பொம்பளை புள்ளைங்க குடிப்பதா ? “

இன்னும் நான்கு ஐந்து ஆட்கள் ( அதில் மூன்று பெண்கள் ) என கூட்டம் சேர அவர்களின் நக்கலுக்கு பயந்து வற்புறுத்தலுக்கு இணங்க,அங்கு போனபின்புதான் தெரிந்தது .

பெண்கள் பீர் மட்டும் அல்ல தம்மும் அடிப்பார்கள் என்று.

முதலில் குழப்பமும் உதறலும் இருந்தாலும். பின்னர் Socialismத்தில் ஐக்கியமாக கற்றுக்கொண்டேன்.

நாளடைவில் நான் எங்கு நிற்கவேண்டும் என்ற தெளிவுடன் நின்றதால் யாரும் என்னை எதற்கும் நிர்பந்திப்பதில்லை.

பெங்களூர் மட்டுமல்ல. இந்தியாவிற்கு வெளியேவும்,நான் பார்த்தவரை குடி என்பதை ஒரு கொண்டாட்ட அளவிலோ, அல்லது உணவின் ஒரு பகுதியாகவோ தான் பல நகரங்களில் பாவிக்கின்றனர்.

அதன்பின் பெங்களூரில் பல கொண்டாட்டங்கள், விழாக்கள்.

சூப்பர் மார்கெட்டுகளில் கூட மதுபானங்கள் விற்கப்படுவது எனக்கு வியப்பைத் தரும். விதவிதமான வடிவமைப்புள்ள பாட்டில்களில் புது புது நிறங்களில் பார்ப்பதற்கு உண்மையில் அழகாகவே இருக்கும். குடிப்பழக்கம் இல்லாதவர்கள் கூட அதனை ரசிக்கும் வகையில் இருக்கும். நண்பர்களுடன் செல்லும்போதெல்லாம் அதனை பார்த்து பார்த்து பல பிராண்டுகளின் பெயர், விலை, வகை எனக்கு அத்துபடி.

பெங்களூரின் படுமட்டமான கடைகள் கூட ஓரளவு காற்றோட்டமும் சுகாதாரமும் உள்ளதாக இருக்கும்.

தமிழ்நாட்டுக் கடைகளின் நிலை வெட்ககேடு.

சில மாதங்களுக்கு முன்பு நக்கீரன் வார இதழ் வெளியிட்ட உண்மைநிலை. தமிழ்நாட்டு பார்களில் விற்கபடுவது முழுவதும் எரிசாராயம் என்ற தகவல் அதிர்ச்சியை தந்தது.

மது தயாரிக்கபடுவதற்கென கடுமையான வழிமுறைகள் உண்டு. பெரும்பாலும் மலரில் இருந்தோ, பழத்தில் இருந்தோ குறிப்பிட்ட காலத்தில் தயாரிக்கப்படவேண்டும்.

ஆனால் இந்த முறைகளில் எல்லாம் தயாரிக்க காலமும் அதிகமாகும் செலவும் அதிகமாகும், அதனால் நேரிடையாக எரிசாராயத்துடன் உரிய அளவில் ஒவ்வொரு மதுவகைக்கு உரிய வாசனை வஸ்துவைக் கலந்து நேரிடையாக புட்டிகளில் அடைக்கப்படுவதாக சொன்னது நக்கீரன் வார இதழின் அந்த கட்டுரை.
முறையாக தயாரிக்கப்பட்ட மதுவை அளவோடு பருகும்போது பெரும் பாதிப்புகள் ஏற்படுவதில்லை. ஆனால் இதுபோன்ற வகைகளை அருந்தும்போது நிச்சயம் கல்லீரலை கரைக்கும். உயிருக்கு உத்திரவாதம் இல்லை.

சமீபத்தில் மதுரையில் நடைபெற்ற ராணுவ ஆள் சேர்க்கும் பணியில் கலந்துகொண்ட அத்தனை பேரும் சொத்தையாக போனது இதனால்தான்.

ஆட்டை கடித்து மாட்டை கடித்து மனுஷனை கடித்த கதையாக, நேற்று முன் தினம் இரண்டு மாணவர்களின் தற்கொலை இன்றைய தமிழ்நாட்டின் நிலையை மேலும் மோசமாக வெளிப்படுத்துகிறது.

உண்மையில் தமிழகத்தின் நிலை படுமோசமாக போய் கொண்டிருக்கிறது. வாழ்வின் அடிப்படையான விளைநிலங்களும் , உடல் ஆரோக்கியமும் கொஞ்சம் கொஞ்சமாக கரைந்துகொண்டிருக்கின்றன.

உரிய மாற்றங்கள் உடனடியாக தேவை.

மதுக்கடைகளை ஒரே நாளில் மூடிவிட முடியாது. அப்படி மூடும் போது குடித்து பழகியவர்களின் உடல்நல மனநல சிக்கல்களை சமாளிப்பது என்பதும் இயலாத காரியம்.

உடனடி தேவை குடியைப் பற்றிய விழிப்புணர்வு. அடுத்து மோசமான பராமரிப்பு மற்றும் சூழல்களுக்கு காரணம் அதில் புழங்கும் பணமும் அரசியலும். அரசியலில் இருப்பவர்கள் தான் பெரும்பாலும் மதுக்கடைகளின் அருகே பார் நடத்துகிறார்கள்.
அதனால் அங்கு அவர்கள் வைத்ததுதான் சட்டம் என்றிருக்கிறது. அவர்களிடம் இருந்து பிடுங்கி, ஆண்களுக்கு சுய உதவிக்குழுக்கள் அமைத்து ஒரே கண்காணிப்பில் கீழ் கொண்டு வரவேண்டும். இவர்களுக்கு சுகாதார பயிற்சி மற்றும் முதலுதவி பயிற்சிகள் அளிக்கபடவேண்டும். இப்படி சொல்வது சிரிப்பு வரவழைக்கலாம். அல்லது குடிக்கு பரிந்துரை செய்வதை போல் தோன்றலாம். குடிப்பவனே நினைத்து திருந்தும் வரை குடியை முற்றிலும் ஒழிக்க முடியாது.எனினும் குறைந்தபட்சம் வாக்களிக்கவாவது அவன் உயிருடன் இருக்க வேண்டும் என்பதால் அரசு அவன் நலத்தில் அக்கறை கொள்ளவேண்டும்.

அடுத்து ரியல் எஸ்டேட் தொழிலுக்கு வருவோம்

பெருகிவரும் மக்கள் தொகைக்கு நல்ல குடியிருப்புகள் அவசியம்.  இதில் மாற்றுக்கருத்து எதுவுமில்லை.ஆனால் அது முறைப்படுத்த ஒன்றாக நிகழ்வதாக தெரியவில்லை.

சிங்கப்பூரில் ஒரு அடியை கூட அரசின் அனுமதியின்று வாங்க முடியாது. அப்படி உரிமை கொண்டாடினாலும் 99 வருடத்திற்கு பிறகு அது மீண்டும் அரசுக்கு சென்றடைந்துவிடும்.

இங்கு நினைத்தவன் எல்லாம் பிளாட் போடலாம் என்ற நிலை. அப்பாவி விவசாயிகளை மூலை சலவை செய்து அவர்களிடம் நிலங்களை வாங்கி கொள்ளை அடித்துகொண்டிருக்கிறார்கள்.

சொந்தவீட்டு கனவுடன் அலையும் மாதாந்திர சம்பளக்காரர்கள் தான் இவர்களின் இலக்கு. அஞ்சு லட்சம் பத்து லட்சம் கொடுத்து எதிர்காலத்தில் உயரும் என்ற நம்பிக்கையில் ஒரு மனையில் முதலீடு செய்வதை விட, விவசாய நிலங்களில் முதலீடு செய்யுங்கள்.ஒரு விவசாயிக்கு வாழ்வுகொடுங்கள் . அவருடன் இணைந்து வேளாண்மை செய்து உங்களுக்கான உணவு தானியங்களை நீங்களே உற்பத்தி செய்துகொள்வதுடன், விற்பதின் மூலம் பணமும் சம்பாதிக்க முடியும். வார விடுமுறைகளில் அங்கு சென்று இயற்கையான சூழலிலும் கொஞ்சம் வாழ்ந்து வரலாம்.
ஒரு நாட்டை காப்பாற்றுவது அரசிடம் மட்டுமல்ல. மக்களிடமும் தான் இருக்கிறது. மக்களால் ஆனதுதான் அரசு. முதலில் மக்கள் என்னவேண்டும் என்பதை தெளிந்துகொள்ளவேண்டும். வாழ தெரியாதவர்கள் வாழும் நாட்டில் ஆளத் தெரியாதவர்களின் ஆட்சி நடக்கும் என்பார் வேதாத்ரி மகரிஷி.

மேற்கண்ட இரண்டு கேடுகளையும் மக்களே தவிர்க்க முடியும். ஆள்பவர்கள் முறையாக ஆள மக்கள் வாழ தெரிந்துகொள்ளவேண்டும்.


குகையில் சிக்கிய குழந்தைகளை காப்பாற்றிய தியானம் !

தாய்லாந்து நாட்டில் குகையில் சிக்கிய குழந்தைகள் மீட்கப்பட்ட பின் தாய்லாந்த்தின் சீல் குழு புகழ்பெற்றதோ இல்லையோ தியானமும் யோகமும் புகழ்பெறத...